Get the latest news at
your fingertips!
Download our app now
LIVE TV
Search
ശരീരത്തിന്‍റെ പ്രവര്‍ത്തനങ്ങള്‍ക്ക് അത്യന്താപേക്ഷിതമാണ് വിറ്റമിനുകള്‍. ഇവയുടെ കുറവ് വലിയ രീതിയില്‍തന്നെ ആരോഗ്യത്തെ പ്രതികൂലമായി ബാധിക്കും. സമീകൃത ആഹാരം കഴിച്ചാലും സമ്മര്‍ദ്ദം, ചില മെഡിക്കല്‍ പ്രശ്‌നങ്ങള്‍, സൂര്യപ്രകാശത്തിന്റെ അഭാവം തുടങ്ങിയ ഘടകങ്ങള്‍ വിറ്റാമിന്റെ കുറവിന് കാരണമായേക്കാം. ഈ കുറവുകള്‍ ചെറിയ ലക്ഷണങ്ങളായി തുടങ്ങി ഗുരുതരമായ അവസ്ഥകളില്‍ വരെ പ്രകടമാകാം. ഇത്തരം കുറവുകള്‍ ഊര്‍ജ നില, മാനസിക ആരോഗ്യം പ്രതിരോധശേഷി എന്നിവയെ ബാധിച്ചേക്കാം. വിറ്റാമിന്റെ കുറവ് ആദ്യഘട്ടത്തില്‍ തിരിച്ചറിയുന്നത് ദീര്‍ഘകാല സങ്കീര്‍ണതകള്‍ എന്തെങ്കിലും ഉണ്ടാകുന്നതിന് മുന്‍പ് ആഹാരത്തില്‍ മാറ്റങ്ങള്‍ വരുത്താനോ ഡോക്ടര്‍മാരുടെ സേവനം തേടാനോ നിങ്ങളെ സഹായിക്കും.
ക്ഷീണം അനുഭവപ്പെടുക
രാത്രി മുഴുവന്‍ ഉറങ്ങിയതിന് ശേഷവും സ്ഥിരമായി ക്ഷീണം തോന്നുന്നത് വിറ്റാമിന്‍ ബി12, വിറ്റാമിന്‍ ഡി , അയേണ്‍ എന്നിവയുടെ കുറവിന്റെ സൂചനയായിരിക്കാം. നല്ല ഉറക്കവും ശരീരത്തില്‍ ജലാംശവും ഉണ്ടായിട്ടും ക്ഷീണം നീണ്ടുനില്‍ക്കുകയാണെങ്കില്‍ ഡോക്ടറെ കാണണം. കൂടാതെ ഭക്ഷണത്തില്‍ ഇലക്കറികള്‍, പയര്‍വര്‍ഗ്ഗങ്ങള്‍ തുടങ്ങിയ അയേണ്‍ സമ്പുഷ്ടമായ ഭക്ഷണങ്ങള്‍ ഉള്‍പ്പെടുത്തുക, ആവശ്യത്തിന് സൂര്യപ്രകാശം ലഭിക്കുന്നുണ്ടെന്ന് ഉറപ്പാക്കുക. വിറ്റാമിന്‍ ബി 12 ന്, മുട്ട, പാലുല്‍പ്പന്നങ്ങള്‍, മത്സ്യം, എന്നിവ നിങ്ങളുടെ ഭക്ഷണത്തില്‍ ഉള്‍പ്പെടുത്തുക. വിറ്റാമിന്‍ ഡി വര്‍ധിപ്പിക്കുന്നതിന് ഇടയ്ക്ക് സൂര്യപ്രകാശം കൊള്ളുക. സാല്‍മണ്‍ പോലുള്ള കൊഴുപ്പുള്ള മത്സ്യം, ഫോര്‍ട്ടിഫൈഡ് പാലുല്‍പ്പന്നങ്ങള്‍ എന്നിവ കഴിക്കുക.
മുടി കൊഴിയുക, നഖങ്ങള്‍ പൊട്ടി പോവുക
അമിതമായ മുടി കൊഴിച്ചില്‍ അല്ലെങ്കില്‍ എളുപ്പത്തില്‍ പൊട്ടിപ്പോകുന്ന നഖങ്ങള്‍ പലപ്പോഴും ബയോട്ടിന്‍ (വിറ്റാമിന്‍ ബി7), സിങ്ക്, അല്ലെങ്കില്‍ ഇരുമ്പ് എന്നിവയുടെ കുറവിന്റെ ലക്ഷണങ്ങളാണ്. മുടിയുടെയും നഖങ്ങളുടെയും ശക്തിയും ഘടനയും നിലനിര്‍ത്തുന്നതിന് ഈ പോഷകങ്ങള്‍ നിര്‍ണായകമാണ്. ഇവയുടെ അഭാവം മുടി കൊഴിച്ചിലിനും തലയിലെ സ്‌കിന്‍ വരണ്ടിരിക്കുന്നതിനും നഖങ്ങള്‍ പൊട്ടിപോകുന്നതിനും കാരണമാകും. അതുപോലെ നട്സ്, മുട്ട, വിത്തുകള്‍, ചീര തുടങ്ങിയ ഭക്ഷണങ്ങള്‍ കഴിക്കുന്നത് വര്‍ദ്ധിപ്പിക്കുക.
ചുണ്ടുകള്‍ പൊട്ടുക, വായില്‍ വ്രണങ്ങള്‍ ഉണ്ടാവുക
വായയുടെ കോണുകളില്‍ വേദനയോടുകൂടിയ പൊട്ടലുകള്‍ ഉണ്ടാവുക, ഇടയ്ക്കിടെയുള്ള വായില്‍ അള്‍സര്‍ ഉണ്ടാവുക ഇതൊക്കെ ബി-കോംപ്ലക്‌സ് വിറ്റാമിനുകളുടെയും (പ്രത്യേകിച്ച് ബി2, ബി3) ഇരുമ്പിന്റെയും കുറവിന്റെ ലക്ഷണങ്ങളായിരിക്കാം. ഈ പോഷകങ്ങള്‍ ചര്‍മ്മത്തിന്റെ ആരോഗ്യത്തെ സംരക്ഷിക്കുകയും കലകള്‍ നന്നാക്കുകയും ചെയ്യുന്നു. ഈ വിറ്റാമിനുകളുടെ അഭാവം വീക്കം, അസ്വസ്ഥത എന്നിവയ്ക്ക് കാരണമാകും. മുട്ട, പാലുല്‍പ്പന്നങ്ങള്‍, പച്ചക്കറികള്‍, മെലിഞ്ഞ മാംസം എന്നിവ കഴിക്കുന്നത് അസ്വസ്ഥതകള്‍ ഇല്ലാതാക്കാനും ചര്‍മ്മത്തെ സുഖപ്പെടുത്താനും സഹായിക്കും.
രാത്രിയിലെ കാഴ്ചക്കുറവും, കണ്ണിലെ വരള്‍ച്ചയും
കുറഞ്ഞ വെളിച്ചത്തില്‍ കാണാന്‍ ബുദ്ധിമുട്ട് അനുഭവപ്പെടുകയോ കണ്ണുകള്‍ വരണ്ടതായി തോന്നുകയോ അസ്വസ്ഥത അനുഭവപ്പെടുകയോ ചെയ്യുന്നത് വിറ്റാമിന്‍ എ യുടെ കുറവിനെ സൂചിപ്പിക്കുന്നു. റെറ്റിനയുടെ ആരോഗ്യത്തിനും കണ്ണിന്റെ മൊത്തത്തിലുള്ള പ്രവര്‍ത്തനത്തിനും വിറ്റാമിന്‍ എ അത്യാവശ്യമാണ്. കാഴ്ച സംരക്ഷിക്കുന്നതിനായി കാരറ്റ്, മധുരക്കിഴങ്ങ്, ചീര, ഓറഞ്ച്, പച്ചക്കറികള്‍ എന്നിവ ഭക്ഷണത്തില്‍ ഉള്‍പ്പെടുത്തുക.
അസ്ഥി വേദനയോ ഒടിവുകളോ ഉണ്ടാവുക
അസ്ഥികളില്‍ വേദനയുണ്ടാവുകയോ ഒടിവുകള്‍ ഉണ്ടാവുകയോ ചെയ്യുന്നത് വിറ്റാമിന്‍ ഡിയുടെയും കാല്‍സ്യത്തിന്റെയും കുറഞ്ഞ അളവിനെ സൂചിപ്പിക്കുന്നു. അസ്ഥികളുടെ ശക്തിക്കും സാന്ദ്രതയ്ക്കും ഈ പോഷകങ്ങള്‍ അത്യന്താപേക്ഷിതമാണ്. വിറ്റാമിന്‍ ഡി ശരീരത്തില്‍ കാല്‍സ്യം ആഗിരണം ചെയ്യാന്‍ സഹായിക്കുന്നു. ദിവസവും 15-20 മിനിറ്റ് സൂര്യപ്രകാശം കൊള്ളാന്‍ ശ്രമിക്കുക. പാലുല്‍പ്പന്നങ്ങളോ പോഷകസമൃദ്ധമായ ഭക്ഷണങ്ങളോ കഴിക്കുക.
മുറിവ് ഉണങ്ങാന്‍ താമസം
മുറിവുകളും ചതവുകളും ഭേദമാകാന്‍ അസാധാരണയില്‍ കൂടുതല്‍ സമയമെടുക്കുന്നുവെങ്കില്‍, ശരീരത്തില്‍ വിറ്റാമിന്‍ സി, സിങ്ക് എന്നിവയുടെ കുറവുണ്ടാകാം. ഈ പോഷകങ്ങള്‍ കോശങ്ങള്‍ നന്നാക്കുകയും രോഗപ്രതിരോധ പ്രവര്‍ത്തനത്തിന് സഹായിക്കുകയും ചെയ്യും. ഈ വിറ്റാമിനുകള്‍ ഇല്ലാത്തതുകൊണ്ട് മുറിവ് ഉണങ്ങുന്നത് മന്ദഗതിയിലാകും. അണുബാധയ്ക്കുള്ള സാധ്യതയും വര്‍ദ്ധിക്കുന്നു. നാരങ്ങ, ഓറഞ്ച് മുതലായ സിട്രസ് പഴങ്ങള്‍, കുരുമുളക്, സരസഫലങ്ങള്‍, നട്ട്‌സ് എന്നിവ ഭക്ഷണത്തില്‍ ഉള്‍പ്പെടുത്താവുന്നതാണ്.
ഭക്ഷ്യേതര വസ്തുക്കളോടുള്ള ആസക്തി
ഭക്ഷ്യേതര വസ്തുക്കളോടുള്ള അസാധാരണമായ ആസക്തിയായ (പിക്ക) എന്ന അവസ്ഥ ഉള്ളവര്‍ ഐസ്, അഴുക്ക്, ചോക്ക് തുടങ്ങിയ വസ്തുക്കള്‍ കഴിക്കാന്‍ താല്‍പര്യമുള്ളവരായിരിക്കും. ഇത്തരത്തിലുളള പ്രവണത ഇരുമ്പിന്റെയോ സിങ്കിന്റെയോ കുറവിന്റെ ലക്ഷണമാകാം. ചുവന്ന മാംസം, പയര്‍വര്‍ഗ്ഗങ്ങള്‍, കക്കയിറച്ചി, തവിടുപൊടികൊണ്ടുണ്ടാക്കുന്ന വിഭവങ്ങള്‍ എന്നിവ കഴിക്കുന്നത് വിറ്റാമിന്‍ സി, സിങ്ക് എന്നിവയുടെ കുറവ് പരിഹരിക്കാന്‍ സഹായിക്കും.
മാനസികാവസ്ഥയിലെ മാറ്റങ്ങള്‍
മഗ്‌നീഷ്യം, വിറ്റാമിന്‍ ഡി, ബി-വിറ്റാമിനുകള്‍ എന്നിവയുടെ അഭാവം മൂലം ഇടയ്ക്കിടെയുള്ള മാനസികാവസ്ഥയിലെ മാറ്റങ്ങള്‍, ഉത്കണ്ഠ അല്ലെങ്കില്‍ വിഷാദം എന്നിവ ഉണ്ടാകാം. തലച്ചോറിന്റെ ആരോഗ്യത്തിനും ന്യൂറോ ട്രാന്‍സ്മിറ്റര്‍ സന്തുലിതാവസ്ഥയ്ക്കും ഈ പോഷകങ്ങള്‍ നിര്‍ണായകമാണ്. കൊഴുപ്പുള്ള മത്സ്യം, നട്സ്, വിത്തുകള്‍, തവിട് തുടങ്ങിയ ഭക്ഷണങ്ങള്‍ മാനസികാരോഗ്യത്തെ പിന്തുണയ്ക്കുന്നു. പതിവായി സൂര്യപ്രകാശം ഏല്‍ക്കുന്നതും മാനസികാവസ്ഥയെ നിയന്ത്രിക്കുന്നതില്‍ വലിയ മാറ്റമുണ്ടാക്കും. കൈകളിലും കാലുകളിലും ഇക്കിളി അല്ലെങ്കില്‍ മരവിപ്പ് ഇവ അനുഭവപ്പെടുന്നത് വിറ്റാമിന്‍ ബി 12 അല്ലെങ്കില്‍ ബി 6 ന്റെ കുറവിനെ സൂചിപ്പിക്കാം. ഈ വിറ്റാമിനുകള്‍ നാഡികളുടെ ആരോഗ്യത്തിന് അത്യന്താപേക്ഷിതമാണ്. കൂടാതെ ഇവയുടെ അഭാവം നാഡികള്‍ക്ക് കേടുപാടുകള്‍ വരുത്തും. നാഡികളുടെ പ്രവര്‍ത്തനം പുനഃസ്ഥാപിക്കുന്നതിന് നിങ്ങളുടെ ഭക്ഷണത്തില്‍ ആനിമല്‍ പ്രോട്ടീനുകള്‍, പോഷകസമൃദ്ധമായ ധാന്യങ്ങള്‍, ഇലക്കറികള്‍ എന്നിവ ഉള്‍പ്പെടുത്തുക.
ഇടയ്ക്കിടെയുള്ള അണുബാധകളും രോഗങ്ങളും
രോഗപ്രതിരോധ ശേഷി കുറയുന്നത് പലപ്പോഴും ആവര്‍ത്തിച്ചുള്ള ജലദോഷം, പനി, അണുബാധ എന്നിവയുണ്ടാകാന്‍ കാരണമാകുന്നു. വിറ്റാമിന്‍ സി, വിറ്റാമിന്‍ ഡി, സിങ്ക് എന്നിവയുടെ അളവ് കുറയുന്നതും ഇതിന് കാരണമാകാം. ഇത്തരം വിറ്റാമിനുകള്‍ എല്ലാം ശരീരത്തെ രോഗാണുക്കളെ ചെറുക്കാന്‍ സഹായിക്കുന്നു. ഓറഞ്ച്, കിവി, വെളുത്തുള്ളി, കൂണ്‍, പുളിപ്പിച്ച ഭക്ഷണങ്ങള്‍ തുടങ്ങിയവ പ്രതിരോധശേഷി വര്‍ദ്ധിപ്പിക്കുന്ന ഭക്ഷണങ്ങളാണ്. ഭക്ഷണത്തോടൊപ്പം പതിവ് ശാരീരിക പ്രവര്‍ത്തനങ്ങളും ജലാംശവും പ്രതിരോധശേഷി വര്‍ധിപ്പിക്കുന്നു.
Content Highlights :Warning signs indicating a deficiency of essential vitamins in the body
